عمار

~~~عمــــــــــــــــــــار~~~

آه من قلب اجتاحته هموم وأكدار...وعيون أفقدت صافي ضواها

وغما سكن الروح أبد ولا ثار...يحرق الروح من ساعة بداها

أنشلع قلبي ومني العقل طار...وعيني من البكي ما جف ماها

أبكي مماته طول المسى والاسحار...وليته الدمع يرجع من في وطاها

نذرا علي لفيض بحور وأنهار...وأشبع الأرض وأروي ضماها

بس عمر الدمع ما يرجع من فلقبار...وعمر التمني ما يبني بناها

وكلت أمري لله ولله نعم الخيار...الله عطاه الروح والله خذاها

كنت أنتظر لحظه الوصول والدم حار...وأرسم الصوره وأتعايش معاها

وأبني آمال فقلبي وأشيد أسوار...ولكن للاسف ما أكتمل بناها

جاني المبشر وقال الحظ ثار...وهللت نفسي بساعة لقاها

وأول من لمحته رحت أردد أذكار...خوفي من عين الحسود تاصل مداها

وأحضنته ايدي مثل شوك لامس أزهار...ولا كما موجه أتعبت من عناها

أنغمر قلبي فرح والنور عم فدار...وحتى جدران البيت الفرح كساها

لون دنيتي وأبعد عني الاكدار...وهموم الحزن عني بعيد رماها

خربط حياتي يمينها مع يسار...وصرت ما عرف ليلها من ضواها

لما يضحك يشفيني من عوق وأضرار...وجنة الدنيا في عيوني بناها

ومن يقول يوبا تفجر فيني أنهار...وأحسني أملك الدنيا ومن حواها

أربع سنين راحن مثل لمح الابصار...ويا مسرع لحظات الفرح في جفاها

غزاه المرض وأصبح الجسم حار...ونار تشتعل في قلبي حماها

وفي لحظه ومن غير سابق انذار...نفس ذاك الشخص قال الروح الله خذاها

صتكت بي الدنيا على كل ما صار...وتمنيت الارض تبلعني في وطاها

طحت وأنا عيوني سيل وأنهار...تبكي بصمت تطلب يرجع ضواها

خذاه الموت وهو توه في عمر الازهار...خذاه عنوة مني وعيني تشهق فبكاها

تمنيته يحمل جنازتي ويكون لي قبار...وليتني أنا فلحد ويرمي علي بثراها

دفنت عمري دفنت روحي دفنت عمار...دفنته بأيدي وعيني تجود ابكاها

رجعت البيت وأجبر رجلي ع المسار...بالزور تمشي متثاقله في خطاها

مستوحش البيت حزين ومنهار...تبكي العدو حالتي من بلاها

هنا يضحك هنا يبكي هنا يدق الطار...هنا لعبته اللي مزعجنا بصداها

هنا رسمه هنا شخابيطه فالجدار...هنا ثيابه هنا قمصانه اللي رماها

هنا فراشه الديباج الناعم المختار...هنا بحضني نام وطابله النوم بكراها

هنا يفز من نومته مستوحش ومحتار...هنا يتدلع بالبكى لاجل حاجه بغاها

هنا ضربته بأيدي يالله يعلها الانكسار...هنا زجرته وياليتني تبكمت من وراها

آه يا دنيا القهر وش وش هذا الذي صار...أيعقل أرميه بحفره وادفن عليه بثراها؟

مبرووك يا أرض فزتي بحضن عمار...ياكبر حضك وأنا حظي بالدنيا رداها

بي نكبة أهل اليمن بذاك الانفجار...سد مأرب أعلن للامه ضماها

وبي نكبة الشيعه بالنجف وذي قار...بذبح الحسين من أكبر خطاها

راحت السنين تجري والعمر طار...اربعين سنه وعيني أبد ما شحت بماها

وأنا اليوم عند فبره وهاضت بي الاشعار...وكتبت ما في روحي وما حواها

.