شخشوخة مسيلية اصلية

السلام عليكن حبيباتي
اليوم بإذن نديرلكم طريقة عمل الشخشوخة المسيلية على أصولها بالمراحل المصورة
طبعا كاين عدة أنواع من الشخشوخة الي تتغلى و لي تتسقى و شخشوخة القمح و كاين تاع الرغدة أوالشعير هاذو بالنسبة لولاية المسيلة
اليوم راح نعمللكم شخشوخة المريش و هاذي لي تتسقى بالمرق نعملوها في المناسبات الدينية أو في الأعراس
مقادير العجين : دقيق رطب من النوع الجيد لي يكون فيه العلك +كمشة فرينة +ملح +ماء أعجني و أدلكي كيما عجين المحاجب و خليه يرتاح

إضغط هنا لرؤية الصورة بحجمها الطبيعي.


ممبعد قطعيه كويرات صغيرة قد حبة الجوز خطرش رايحين نديرو ب 2 طبعا إستعملي الزيت ... في الصورة يبانو كبار بصح هما صغار و أطلقوا كي إرتاحوو

إضغط هنا لرؤية الصورة بحجمها الطبيعي.


هنا تبداي حطي الطاجين يسخن على نار هادئة
حطي كويرتين فوق بعض و ديري بيناتهم الزيت و أبداي تحلي رقيق وهزيها حطيها فوق الطاجين و غير تشوفيها نشفت أقلبيها رايحة تنتفخ شوفي

إضغط هنا لرؤية الصورة بحجمها الطبيعي.



و غير تشوفيها نشفت ثواني فقط أقلبيها رايحة تنتفخ شوفي


إضغط هنا لرؤية الصورة بحجمها الطبيعي.



و تقعدي تقلبي حتى تشوفيها طابت مالازمش تتحرق أو تيبس


إضغط هنا لرؤية الصورة بحجمها الطبيعي.


هنا هزيتها باش يطيبو الجواشي ممبعد نحيها و حطي أخرى طيب و هكذا

إضغط هنا لرؤية الصورة بحجمها الطبيعي.



طبعا لي طيبيها لازم تفتيها بسرعة باش ماتبسش ممبعد تجيك صعيبة المهم لازمك اتقرصي القرصة و طيبيها و تفتيها في نفس الوقت وإذا عندك البنات أو لي يعاونك نقولك ياسعدك هههه أعطيهم يفتولك
إضغط هنا لرؤية الصورة بحجمها الطبيعي.


إضغط هنا لرؤية الصورة بحجمها الطبيعي.

نجو للمرق ساهل ماهل :
نحتاجو قطع لحم أو دجاج
بصل كمية مليحة وكل ماكان المرق بزاف كل مانزيدو البصل بزاف و أنا عائلة صغيرة عملت 3 بصلات متوسطين و 3 سنات كبار ثوم المهم هي تحب البصل بزاف
2 حبات طماطم حب مرحية
القليل من الشحم أنا مادرتوش راجلي مايحبش حتى يشوفو بصح يمد بنة هايلة
قليل من الزيت، ملح. ملعقة أكل فلفل أحمر مرحي و لي يحب الحار يزيد
لفاح و هو كسبر حب مرحي متبل فيه بزاف حوايج أخرين تخدمو أمي
قطعة صغيرة سكر أو ملعقة قهوة باش يوزن حموظة الطماطم
حمص ، طماطم علب ، كسبر أخضر و فلفل أخضر






نرحي البصل و الثوم و الطماطم الحب و نفرغ على اللحم +نحط التوابل ملعقة فلفل أحمر +ملعقة لفاح +ملح +سكر+الشحم +الحمص +شوية زيت+طماطم علب+و نحمص كلشي مليح مليح تم نمرق و ندير قليل من الحشيش مقطع و نغلق الكوكوطة تطيب حتى يطيب اللحم

إضغط هنا لرؤية الصورة بحجمها الطبيعي.


إضغط هنا لرؤية الصورة بحجمها الطبيعي.


إضغط هنا لرؤية الصورة بحجمها الطبيعي.




ننزع اللحم ثم نعطر المرق بملعقة لفاح أو الكسبر المرحي و نزيد الحشيش و الفلفل الأخضر نشقه و نرميه في المرق و هذه هي مرقتنا وجدت

إضغط هنا لرؤية الصورة بحجمها الطبيعي.


إضغط هنا لرؤية الصورة بحجمها الطبيعي.






أنا هنا خدمت اللفتات أو الرقاق أو الشواط نهار من قبل فلازم نفوره شوية فقط قيس ممايسخن خطرش يتعجن و نغطيه

إضغط هنا لرؤية الصورة بحجمها الطبيعي.



نجو لطريقة التقديم
نجيبو قصعة أو طبسي عريض نحط قليل من المرق و نحط فوقه القليل من الرقاق ثم نسقيه بالمرق ثم نحط الرقاق ثم نزيد نسقيه و هكذا حتى نكمل و نعمر الطبسي نزين بالحمص و الدبشة و الفلفل المقطع و اللحم و نقدمه مباشرة مالازمش يقعد مدة طويلة خطرش يبرد و ينشف و تروح بنتو

إضغط هنا لرؤية الصورة بحجمها الطبيعي.


إضغط هنا لرؤية الصورة بحجمها الطبيعي.


إضغط هنا لرؤية الصورة بحجمها الطبيعي.





و راكم معروضين أتفضلو حبيباتي
حقى أحنا الدبشة فوق الشخشوخة لااااااااااااازم يعني لي يحطلك شخشوخة بلا حشيش كلي ماحطلك والو
و نحب نشكر بزااااف أم كوثر على االتثبيت يااااااااااي

شكرا لكي ولي عمار كل الشكر والتقدير لاخاطر هو يلي علمني

بوجودكم حبيبتي شموع

شكرا لردودكم الزكية

شكرا لردودكم الزكية